Gataði fermingarstúlku á almenningssalerni

Í tilkynningu frá lögreglunni er varað við netnotkun barna og rifjað upp mál sem kom inn á borð lögreglunnar í sumar. Þar komst stúlka á fermingaraldri í samband við mann í gegnum Netið og mæltu þau sér mót í verslunarmiðstöð á höfuðborgarsvæðinu. Þau fóru síðan á almenningssalerni á staðnum en þar setti maðurinn lokk eða pinna í nafla stúlkunnar að hennar ósk. Nokkru síðar var kominn gröftur í naflann og þurfti stúlkan að leita til læknis og var fyrrnefndur hlutur fjarlægður úr naflanum.

„Málið vekur upp ýmsar spurningar sem verður reyndar ekki svarað hér en það var forráðamaður stúlkunnar sem tilkynnti um það. Mál sem þetta er ekki einsdæmi né heldur hitt að forráðamenn barna og unglinga eru ekki alltaf meðvitaðir um það sem krakkarnir taka sér fyrir hendur. Í þessu tilfelli var foráðamönnum stúlkunnar ókunnugt um það að hún hefði mælt sér mót við ókunnugan mann og í þeim tilgangi sem áður var lýst.

Vegna þessa vill lögreglan benda forráðamönnum barna og unglinga á að kynna sér vefsíður þar sem fjallað er um örugga netnotkun. Ein þeirra er saft.is en á henni er að finna ýmsar gagnlegar ábendingar um þetta efni. M.a. eru birt þar tíu svokölluð netheilræði sem gott er fyrir alla að hafa í huga," segir í tilkynningu frá lögreglunni.