Friðarsúlan skín líka á netinu

Kveikt var á friðarsúlunni sem tileinkuð er minningunni um Bítilinn John Lennon í þrívíddarútgáfu af Viðey sem finna má í netsamfélaginu Second Life, nokkrum stundum eftir sama viðburð hér á föstudag.

Þrívíð persóna Yoko Ono, ekkju Lennons, hélt stutta tölu við athöfnina í Second Life. Hún sagðist meðal annars óska þess að fólk kæmi að súlunni þegar sól hnigi til viðar dag hvern í samfélaginu og óskaði sér friðar. „Munið að hvert okkar hefur kraft til að breyta heiminum,“ sagði persóna hennar.

AFP-fréttastofan segir Yoko Ono hafa dansað að því loknu fram á morgun. Tíminn líður hratt í Second Life en sólarhringarnir þar eru sex á móti hverjum einum í raunveruleikanum.

Kveikt verður á friðarsúlunni jafn lengi í netheimum og raunveruleikanum, eða frá fæðingardegi Lennons 9. október fram á dánardægur hans 8. desember.

Friðarsúlan í Second Life er á þrívíddarútgáfu af Viðey á netinu sem nefnist Imagine Peace Island og mun þar vera nákvæm útgáfa af Viðeyjarstofu. Guðlaug Elísabet Ólafsdóttir, verkefnisstjóri Viðeyjar hjá Reykjavíkurborg, segir ýmsa afþreyingu í boði fyrir gesti neteyjunnar; þeir geti slakað á í heitum laugum, hoppað á milli skýja og svifið yfir friðarsúluna í loftbelg.- jab