Martinez: Sir Alex Ferguson fær sérmeðferð hjá FA

Knattspyrnustjórinn Roberto Martinez hjá Wigan gagnrýnir enska knattspyrnusambandið (FA) harðlega fyrir að þora ekki að taka á knattspyrnustjóranum Sir Alex Ferguson hjá Englandsmeisturum Manchester United.

Martinez segir Ferguson fá sérmeðferð og megi nánast segja og gera hvað sem honum listir og þá séu hann með hálfgerðan klappstýruhóp af knattspyrnustjórum í kringum sig sem bakki hann upp við hvert tækifæri.

„Ferguson var ávíttur fyrir að segja að dómari væri ekki í nægilega góðu formi á dögunum og enska knattspyrnusambandið nánast bað Ferguson afsökunar á því að refsa honum fyrir ummælin á meðan sumir aðrir knattspyrnustjórar hefðu fengið að kenna á því. Ferguson hefur verið svo lengi til staðar í þessum bransa að það vegur mjög þungt þegar svona mál koma upp og hann fær því sérmeðferð.

Ferguson hefur þar fyrir utan kollega sem eru hliðhollir honum í einu og öllu. Steve Bruce sem lék undir hans stjórn og Sam Allardyce sem vonast til þess að taka við starfi hans á Old Trafford eru á meðal þeirra. Þar fyrir utan stendur Rafa Benitez [stjóri Liverpool] sem þorir að bjóða Ferguson byrginn og fær að kenna á því fyrir það," segir Martinez í viðtali við spænska blaðið AS.