Stjórnvöld hafa ekki staðið við samkomulagið við AGS

Eygló Harðardóttir, þingmaður Framsóknarflokksins, segist sannfærð um að ríkisstjórnin hafi ekki staðið við sinn hluta samkomulagsins við Alþjóðagjaldeyrissjóðinn. Hún segir einkennilegt að ekki hafi komið fram um hvað endurskoðun samkomulagins við sjóðinn snúist. Þá telur hún klofning vera á milli og innan stjórnarflokkanna um lántökuna.

Steingrímur J. Sigfússon, fjármálaráðherra, segist vona að næsti hluti lánsins frá Alþjóðagjaldeyrissjóðsins verði greiddur á næstu vikum í framhaldi á endurskoðun samkomulagsins.

Nokkrar tafir hafa orðið á afgreiðslu AGS á næsta hluta lánveitingar sjóðsins til Íslands. Sendinefnd frá sjóðnum er stödd hér á landi að eigin ósk til að funda með íslenskum ráðamönnum.

Ríkisstjórnin hefur ekki staðið við samkomulagið

Eygló segir einkennilegt að hvergi hafi komið fram um hvað endurskoðun efnahagsáætlunarinnar snúist. Ef ríkisstjórnin hefði hug á ræða um endurskoðun á vaxtakjörum myndi hún væntanlega kalla eftir því að sendinefndin kæmi til landsins en ekki öfugt.

Þingmaðurinn telur að ástæðan á bak við komu sendinefndarinnar sé sú að ríkisstjórnin hafi ekki staðið við samninga sína við sjóðinn. „Ég tel að ástæðan fyrir því að sjóðurinn er ekki búinn að greiða okkur þennan hluta lánsins sé einfaldlega sú að ríkisstjórnin hefur ekki staðið við sinn hluta samningsins."

Formenn þurfa stuðning þingmanna sinna

Þá segir Eygló að svo virðist sem að klofningur sé innan og á milli stjórnarflokkanna um hvort stjórnvöld eigi að taka við AGS-láninu. Hún telur að ekki séu allir þingmenn VG sáttir með að formaður flokksins ætli að veita láninu frá sjóðnum viðtöku á næstunni sem fjármálaráðherra.

Máli sínu til stuðnings nefnir Eygló að Ögmundur Jónassonar, Guðfríðu Lilju Grétarsdóttur og Lilju Mósesdóttur hafi haft efasemdir um lántökun frá sjóðnum. „Þó að Jóhanna og Steingrímur virðist vilja trúa því að þau ráði ein þá þurfa þau stuðningi þingmanna sinna að halda."