Höllinni breytt í geimskip

Tölvuleikjafyrirtækið CCP heldur árlega ráðstefnu fyrir aðdáendur tölvuleiksins EVE Online nú í byrjun október. Ráðstefnunni lýkur með stórri veislu sem haldin verður í Laugardalshöllinni og hefur fyrirtækið ákveðið að bjóða Íslendingum upp á sérstakt miðaverð svo að sem flestir geti komið og upplifað þennan viðburð. Starfsmenn CCP hafa unnið að undirbúningi fyrir ráðstefnuna frá því í mars í samvinnu við fyrirtækið Exton.

„Laugardalshöllinni verður breytt í geimstöð og þar verður haldið heljarinnar partí fyrir ráðstefnugesti og alla þá sem hafa gaman að góðri tónlist og góðu partíi. Meðal þeirra sem stíga á stokk eru plötusnúðurinn Dj Alienhand/RealX, sem leikur tónlist sem líkist þeirri sem er í EVE Online, Dj Margeir ásamt sextán manna strengjasveit auk húsbandsins RöXöR. Þetta verður mjög glæsilegur viðburður og ég hvet sem flesta til að mæta og taka þátt í gleðinni,“ segir Diljá Ámundadóttir, framleiðandi hjá CCP, sem skipuleggur viðburðinn ásamt Oddi Erni Halldórssyni, stjórnanda Fan Fest-ráðstefnunnar.

Um 300 þúsund manns spila EVE Online að staðaldri og í fyrra sóttu 800 erlendir spilarar ráðstefnuna. „Við reiknuðum út að hver og einn hafi eytt sem nemur 120 þúsund krónum í flug og uppihald í fyrra sem gerir um hundrað milljónir. Við gerum ráð fyrir svipuðum fjölda í ár þannig þetta ætti að hafa góð áhrif á íslenskt efnahagslíf,“ segir Diljá.

Aðspurð segir Diljá að ráðstefnan sé vel sótt af dyggum spilurum EVE

Online ár hvert. Þeir koma á ráðstefnuna til að hlýða á fyrirlestra, taka þátt í ýmiskonar verkefnavinnu og til að hitta hver annan. „Þetta er fólk sem hefur verið í sambandi næstum daglega síðastliðin ár og þarna gefst þeim tækifæri á að hittast og spjalla saman og jafnvel undirbúa næstu árás. Það eru einnig margir sem vilja hlýða á fyrirlestur um nýjan leik sem er enn í framleiðslu og kallast Dust 504 og gerist í sýndarveruleika sem svipar til íslensks landslags og getur haft áhrif á gang mála í EVE Online og öfugt. Þetta er tækninýjung sem hefur aldrei verið notuð áður. Dyggustu spilurunum finnst einnig mjög gaman að fá tækifæri til að hitta starfsfólk fyrirtækisins sem er hálfgerðar stjörnur í þeirra augum,“ segir Diljá.

Ráðstefnan fer fram 1. til 3. október, en lokahófið sjálft verður laugardagskvöldið 3. október og geta áhugasamir nálgast miða á viðburðinn á vefsíðunni midi.is.