Ríkið sýknað af hlaupaárás

Ríkið var sýknað í Héraðsdómi Reykjavíkur í dag vegna skaðabótakröfu sem maður á sextugsaldri lagði fram. Málavextir eru þeir að maðurinn var að ganga heim til sín eftir að hafa skemmt sér í miðborg Reykjavíkur í febrúar árið 2005. Þegar hann kom fyrir horn á húsi við Hverfisgötu kom maður hlaupandi á harðaspretti á móti honum.

Stefnandinn reyndi að forða sér frá honum en það tókst ekki. Hlauparinn hljóp manninn niður með þeim afleiðingum að stefnandi lær- og mjaðmargrindarbrotnaði.

Hlauparinn hlúði í fyrstu að manninum. Að beiðni þolandans aðstoðaði árásamaðurinn hann að reisa sig upp en sleppti svo snögglega takinu og hljóp í burtu þegar tvö vitni sögðust hafa hringt og óskað liðsinnis lögreglu. Við það féll hann aftur til jarðar enda það illa slasaður að hann gat með engu móti staðið óstuddur.

Maðurinn þurfti að leita sér aðhlynningar á spítala auk þess sem hann dvaldi á sjúkrahóteli í kjölfarið. Hann brá á það ráð að kæra manninn til lögreglu fyrir líkamsárás en hlauparinn fannst aldrei og því málið látið niður falla.

Það var þá sem hann lögsótti ríkið og krafðist þrettán hundruð þúsund króna í skaðabætur á þeim forsendum að hann ætti rétt á bótum vegna þess að hann væri fórnalamb refsiverðs verknaðar.

Héraðsdómur Reykjavíkur féllst ekki á þau rök. Svo virðist sem dómari hafi túlkað hlaupaárásina sem svo að um óviljaverk hafi verið að ræða. Því var ríkið sýknað af skaðabótakröfu mannsins sem varð fyrir hlauparanum.