Síríus suðusúkkulaði hefur ekkert breyst í 76 ár

Vegna yfirlýsinga Sverris Guðjónssonar í Fréttablaðinu í dag, vill sælgætisframleiðandinn Nói Síríus taka skýrt fram að Síríus Konsúm súkkulaðið hefur ekkert breyst í nærri heila öld. Fyrirtækið harmar rangfærslur þær sem söngvarinn setur fram í blaðinu, um að breytingar hafi orðið á innihaldi súkkulaðisins. Þetta er alrangt. Þetta kemur fram í yfirlýsingu frá Nóa Siríus í dag. Þar segir ennfremur:

„Nói Síríus hefur aldrei notað dýrafitu í neina af sínum framleiðsluvörum. Konsúm-súkkulaðið er og hefur verið helsta stolt Nóa Síríus og aldrei kæmi til greina að hálfu fyrirtækisins að gera tilraunir með samsetningu þess. Þvert á móti þá hefur sama uppskriftin verið notuð frá upphafi og gæði súkkulaðsins hafa ávallt verið höfð að leiðarljósi, eins og með allar vörur frá Nóa Síríus. Þessu verða neytendur að geta treyst.

Konsúm súkkulaðið hefur fylgt þjóðinni allar götur frá árinu 1933. Það er orðið partur af menningu okkar og hefur jafnan hlotið mikið lof erlendra matreiðslumeistara sem komið hafa hingað til lands. Sölutölur Nóa Síríus sýna enn fremur að súkkulaðið hefur aldrei verið vinsælla. Sala þess hefur nærri tvöfaldast síðustu mánuði. Það segir sig sjálft að engum dettur í hug að gera breytingar á svo vinsælli vöru.

Nýlegar rannsóknir vísindamanna sýna að hófleg neysla á dökku gæðasúkkulaði getur haft jákvæð áhrif á heilsuna, myndað vörn gegn hjartasjúkdómum, það lækki blóðþrýsting og sé minna fitandi en venjulegt mjólkursúkkulaði. Einnig virðist sem að fólk neyti almennt minna magns í einu, af dökku súkkulaði, en t.d. mjólkursúkkulaði."