Sjö handteknir með fíkniefni á Akureyri

Lögreglan á Akureyri handtók í gærkvöldi alls sjö aðila á aldrinum 18-40 ára í þremur aðskildum málum og framkvæmdi húsleit í þremur íbúðum í bænum. Í þessum málum var lagt hald á um 112 grömm af kannabisefnum auk tækja og tóla til fíkniefnaneyslu. Allir voru látnir lausir að yfirheyrslum loknum og teljast málin upplýst.

Þá var einn ökumaður stöðvaður við eftirlit grunaður um akstur undir áhrifum fíkniefna. Við aðgerðirnar naut lögreglan aðstoðar liðsmanna sérsveitar ríkislögreglustjóra á Akureyri.

Lögreglan minnir á upplýsingasímsvarann 800-5005 og netfangið info@rls.is þar sem fólk getur komið upplýsingum um fíkniefnamisferli nafnlaust á framfæri.