Með amfetamín í leggöngum á Litla-Hrauni

Tuttugu og þriggja ára gömul stúlka var dæmd í eins mánaðar skilorðsbundið fangelsi í Héraðsdómi Suðurlands í morgun. Stúlkan reyndi að smygla amfetamíni og öðrum sjö óþekktum töflum inn á Litla-Hraun í mars á síðasta ári. Efnin hafði stúlkan falið í leggöngum sínum en það var árvökull fíkniefnahundur fangelsins sem „merkti" stúlkuna. Hún játaði verknaðinn fyrir dómi og varði sig sjálf.

Stúlkan var með 32,64 grömm af amfetamíni ásamt 7 óþekktum lyfjatöflum, eins og það er orðað í ákæru, í tveimur pakkningum í leggöngum sínum þegar hún kom í fangelsið.

Stúlkan mætti ekki fyrir dóminn við þingfestingu á sínum tíma og var þá gefin út handtökuskipun. Hún mætti síðan fyrir dóm þann 2.október í lögreglufylgd.

„Ákærða krafðist vægustu refsingar og þess að skilorð, sem hún hafði rofið með broti sínu, yrði ekki dæmt upp þar sem hún væri búin að vera í meðferð síðustu sex mánuði, hún ynni að því að komast á réttan kjöl auk þess sem hún ætti von á barni að mánuði liðnum. Hún búi nú í tilsjónaríbúð á vegum félagsmálayfirvalda og fái mikinn stuðning sem hún nýti sér, auk þess sem hún muni fá áframhaldandi stuðning í meðferð og varðandi barnið eftir fæðingu þess," segir í dómnum.

Hún á að baki nokkurn brotaferil en var síðast dæmd árið 2006. Í ljósi þess magns sem hún var með og að hún játaði brot sitt þótti refsing hæfileg einn mánuður skilorðsbundinn. Hún var einnig dæmd til að greiða sakarkostnað upp á rúmar 75.000 krónur.