Leikur aðalhlutverkið í myndum um Wallender

Sverrir Guðnason, þrítugur Íslendingur sem búsettur er í Svíþjóð, leikur eitt aðalhlutverkanna í nýjum sjónvarpsþáttum um rannsóknarlögreglumanninn Kurt Wallender. Um er að ræða þrettán myndir, tólf sem fara á DVD-diska og síðar í sjónvarp og svo eina kvikmynd sem sýnd verður í sænskum kvikmyndahúsum. „Ég hef verið að leika mikið í Svíþjóð, bæði í sjónvarpi og kvikmyndum, og var bara fengin til að vera með, þetta er bara mjög gott mál“ segir Sverrir í samtali við Fréttablaðið.

Sverrir hefur búið mestalla ævi sína í Svíþjóð. Ef undanskilin eru átta ár hér heima. „Ég bjó hérna úti til fjögurra ára aldurs en þá fluttum við heim,“ segir Sverrir en hann er sonur Guðna Jóhannessonar, orkumálastjóra. „Við bjuggum hér þar til ég varð tólf ára en þá snérum við aftur til Svíþjóðar.“ Þessi átta ár höfðu þó mikil áhrif á Sverri því það var hér sem draumurinn um að verða leikari kviknaði. „Ég lék ungan Ólaf ljósvíking í uppfærslu Borgarleikhússins árið 1989 og eftir það var framtíðarstarfið eiginlega ákveðið,“ segir Sverrir og hlær.

En þá aftur að Wallender. Sverrir segir þetta hafa verið mikla vinnu, tökur hafi staðið yfir í eitt og hálft ár. „Ég leik Pontus og þetta hlutverk er lítið í fyrstu myndunum. En svo vex því ásmeginn og í mynd númer tíu, held ég, er Pontus hálfpartinn í aðalhlutverki,“ útskýrir Sverrir en þegar hann hefur safnað kröftum eftir Wallender-tímabilið þá mun hann leika fyrir sænska ríkissjónvarpið. Sverrir vildi ekki gefa upp hvað það væri, slíkt væri ekki tímabært eins og málin stæðu í dag.

Sverrir heimsækir Ísland tvisar á ári og segist alltaf hugsa um sig sem Íslending þótt hann hafi verið búsettur svona lengi í Svíþjóð. Og hann útilokar ekki að leika í einhverju íslensku verki þegar fram líða stundir. „Það er alltaf draumur, að koma heim og leika. Það virðist allavega alltaf vera eitthvað í gangi á Íslandi.“freyrgigja@frettabladid.is