ESB-ályktun hugsanlega opinberuð í dag

Þingsályktunartillaga utanríkisráðherra um aðildarviðræður við Evrópusambandið verður hugsanlega opinberuð í dag, en hún verður lögð fyrir Alþingi í næstu viku. Lítið ber á milli ríkisstjórnarinnar og framsóknarmanna í málinu. Þetta segir Össur Skarphéðinsson, utanríkisráðherra. Forystumenn stjórnarandstöðuflokkanna hafa furðað sig á því af hverju leynd ríki yfir þingsályktuninni. Össur segist ekki hafa viljað láta ályktunardrögin fara frá sér fyrr en að hafa rætt þau við forystumenn stjórnarandstöðuflokkanna.

Formenn stjórnarflokkanna kynntu drög að þingsályktunartillögunni fyrir forystumönnum stjórnarandstöðuflokkanna í gær. Jafnframt fundaði Össur með þeim í dag. „Þetta voru mjög uppbyggilegar viðræður sem ég átti við þá í sitthvoru lagi," segir Össur sem á allt eins von á því að ræða ennfrekar við þá um málið á næstu dögum.

Ráðherrann segist hafa átt sérlega skemmtilegar og gagnlegar viðræður við Sigmund Davíð Gunnlaugsson, formann Framsóknarflokksins. „Hann er skynsamur ungur leiðtogi og að mínu viti er mjög skammt á milli annars vegar þeirrar tillögu sem við höfum í smíðum og hins vegar landsfundarályktunar Framsóknarflokksins."

Össur kveðst sömuleiðis hafa átt gagnlegar viðræður við Bjarna Benediktsson, formann Sjálfstæðisflokksins, þrátt fyrir að ljóst sé að mikið beri á milli hugmynda ríkisstjórnarinnar og hugmynda Sjálfstæðisflokksins.

Þá segir Össur að gott hafi verið að ræða við Þór Saari, þingmann Borgarahreyfingarinnar, og kynnast viðhorfum hans. „Ég get í reynd fallist á allar forsendur Borgarahreyfingarinnar fyrir stuðningi sínum við tillöguna."