Ræningjarnir voru í annarlegu ástandi

Mennirnir sem handteknir voru skammt frá verslun 10-11 í Engihjalla í gærkvöldi voru í annarlegu ástandi. Þeir hafa ekki verið yfirheyrðir en líklegt þykir að mennirnir hafi ætlað að nota féð úr ráninu til þess að fjármagna fíkniefnaneyslu.

Það var um átta leytið í gærkvöldi sem lögregla fékk tilkynningu um ránið, en þar hafði aðili ógnað starfsfólki og viðskiptavini með hnífi. Komst hann á brott með fjármuni úr búðarkassa verslunarinnar. Félagi mannsins beið hans úti í bíl og keyrðu þeir á brott í snatri.

Lögregla fann þá skömmu síðar skammt frá versluninni en þeir voru á stolnu ökutæki. Að sögn rannsóknarlögreglunnar í Kópavogi voru mennirnir undir áhrifum lyfja en þeir eru fæddir árið 1978 og 1985.

Lögreglan vill minna á að lítið sé að hafa upp úr ránum sem þessu. Starfsfólk í verslunum fer reglulega með fé í öryggishólf og því er oftast sáralítið af peningum í búðarkössum.

Starfsfólk verslunarinnar mun hafa haldið ró sinni meðan á ráninu stóð, en maðurinn sýndi nokkuð ógnandi tilburði þegar hann otaði hnífnum í versluninni.

Mennirnir hafa ekki enn verið yfirheyrðir og því liggur ekki fyrir hvað þeim gekk til. Líklegt þykir þó að þeir hafi ætlað að nota féð úr ráninu til þess að fjármagna fíkniefnaneyslu.