Mezzoforte til Suður-Afríku

Hljómsveitinni Mezzoforte hefur verið boðið að spila á djasshátíð í Höfðaborg í Suður-Afríku næsta vor. Þetta verður í fyrsta sinn sem sveitin spilar í heimsálfunni.

„Okkur bauðst að fara til Suður-Afríku árið 1984 en þá var það ekki pólitískt rétt að fara þangað. Þá var aðskilnaðarstefnan í gangi og það fór enginn til Suður-Afríku. Það verður gaman að koma þangað,“ segir hljómborðsleikarinn Eyþór Gunnarsson. Hann segist ekki vita hvort Mezzoforte eigi stóran aðdáendahóp í landinu. „Við eigum aðdáendahópa mjög víða í heiminum en ég veit ekki hvernig það er í Suður-Afríku.“

Eftir að tónleikarnir þar í landi verða afstaðnir í apríl á Mezzoforte aðeins eftir að spila í einni heimsálfu til viðbótar, Ameríku. Þangað hefur hljómsveitin aldrei reynt að komast að neinu ráði. „Við vitum að það er ekkert auðvelt að komast inn á þann markað. Menn þurfa að leggja á sig grunnfórnarvinnu til að brjótast þar inn,“ segir Eyþór. „Þegar leikurinn stóð sem hæst hjá okkur var nóg að gera annars staðar en það væri gaman að fá að spila þar einhvern tímann ef tækifærið gefst.“

Eyþór var á leiðinni til Búdapest í Ungverjalandi ásamt félögum sínum þegar Fréttablaðið náði tali af honum. Þar spilar Mezzoforte annað kvöld. Á mánudaginn spilar sveitin síðan í Rúmeníu og á miðvikudag í Búlgaríu. „Við skreppum alltaf af og til. Þetta hefur gengið mjög vel.“ - fb