Ölvaður vélhjólamaður rotaðist við umferðaróhapp

Réttindalaus vélhjólamaður, sem er grunaður um ölvun við akstur, rotaðist þegar hann missti stjórn á mótorcrosshjóli og hafnaði nokkuð fyrir utan veg í hádeginu í dag. Lögreglan segir að talið sé að ökumaðurinn hafi legið utanvegar í um eina klukkustund þar til vegfarendur komu auga á hann. Hjálmur sem maðurinn var með losnaði af honum við fallið. Hann var léttklæddur, ber að ofan með peysu bundna um hálsinn.

Lögregla og sjúkralið fóru á vettvang og hlúðu að manninum, sem kom þá fljótlega til meðvitundar. Hann var fluttur með sjúkrabifreið á Heilbrigðisstofnun Suðurnesja til skoðunar. Samkvæmt upplýsingum frá lögreglu reyndust meiðslin þá vera minniháttar og gistir maðurinn nú fangageymslur lögreglunnar og bíður yfirheyrslu.