Flestir sögðust kjósa Sjálfstæðisflokkinn

Sjálfstæðisflokkurinn hefur mest fylgi allra stjórnmálaflokka meðal svarenda í nýrri könnun sem Capacent Gallup gerði fyrir Ríkisútvarpið og Morgunblaðið.

Niðurstöður könnunarinnar urðu þær að Sjálfstæðisflokkurinn er með 29% fylgi á meðal svarenda og bætir við sig tæpum þremur prósentustigum frá síðustu könnun. Samfylkingin er með 27,5% fylgi, tapar 3,5 prósentustigum, Vinstri Grænir eru með 25,9% fylgi í könnun Gallup og auka fylgið um 1,3 prósentustig. Vikmörk í þessari könnun eru ríflega 3% fyrir þrjá stærstu flokkana. Framsóknarflokkurinn mælist með 12,6% fylgi - nánast það sama og í síðustu könnun.

Tæplega 80% af þeim sem svöruðu taka afstöðu og athygli vekur að fjórflokkarnir - Sjálfstæðisflokkurinn, Samfylking, Vinstri Grænir og Framsóknarflokkurinn, fá samanlagt um 95% stuðning.

Svör við könnuninni benda til þess að Sjálfstæðisflokkurinn gæti fengið 20 þingmenn, Samfylking 18 og Vinstri Grænir 17 - sem þýðir að núverandi ríkisstjórn héldi velli, gengi þessi niðurstaða eftir. Framsókn fengi átta þingmenn.