Dalai Lama heimsækir Háskóla Íslands

Dalai Lama, andlegur leiðtogi Tíbeta sem verið hefur í útlegð í hálfa öld, heimsækir Háskóla Íslands í dag í boði rektors og Hugvísindasviðs skólans þar sem hann mun eiga samverustund með stúdentum og starfsfólki skólans.

Dalai Lama heimsækir Alþingi í dag en þar mun Ásta Ragnheiður Jóhannesdóttir, forseti Alþingis, taka á móti trúarleiðtoganum og mun eiga með honum fund ásamt þingmönnum í utanríkismálanefnd.

Dagskráin í Háskólanum verður á þá leið að Kristín Ingólfsdóttir, rektor Háskóla Íslands, mun opna samkomuna, síðan mun Dalai Lama halda framsögu og að því búnu eiga samræðu við þrjá kennara Háskólans, þau Pétur Pétursson, prófessor í guðfræði, Pál Skúlason, prófessor í heimspeki og fyrrverandi háskólarektor og Sigríði Þorgeirsdóttur, dósent í heimspeki.

Fram kemur í tilkynningu að samkoman sé einungis ætluð stúdentum Háskólans og starfsfólki hans á meðan húsrúm leyfir. Samkoman fer fram í Hátíðasal í Aðalbyggingu og hefst klukkan hálfellefu og lýkur klukkan tólf.