Algjörlega fráleitt að verið sé að tefja Evrópumálið

Sigmundur Davíð Gunnlaugsson formaður Framsóknarflokksins mælti fyrir tillögu stjórnarandsötðunar um mögulega umsókn um aðild að Evrópusambandinu í Alþingi í dag. Sagði hann meðal annars að algjörlega fráleitt væri að halda því fram að tillagan væri tilraun til þess að tefja málið líkt og haldið hefur verið fram.

Í gær mælti Össur Skarphéðinsson utanríkisráðherra fyrir tillögu ríkisstjórnarinnar sem er keimlík þeirri sem Sigmundur mælti fyrir í dag. Sigmundur sagði þó að í tillögu stjórnarandstöðunnar væri talað um að ljúka málinu fyrir 31.ágúst á þessu ári.

„Til þess að óþreyjufullir menn sem löngu eru búnir að gera upp hug sinn geti andað rólega," sagði Sigmundur.

Hann talaði einnig um að svo virtist vera að menn væru ekki einu sinni tilbúnir til þess að gefa þinginu tíma til þess að ræða þetta mál.

„Svo mikið gekk á að stjórnarliðar voru fengnir til þess að hætta við að tala um tillögu stjórnarinnar, og sumir virðast meira að segja hafa gert það," sagði Sigmundur og benti á að fyrir vikið hefði tillaga andstöðunnar komist fyrr á dagskrá.

Hann vonaði síðan að málið yrði rætt á málefnanlegum nótum og hann sagði að nú myndi reyna á samvinnu og að þingmenn myndu greiða atkvæði eftir sinni bestu samvisku.