Ólöglegur kappakstur á Granda

Lögreglan á höfuðborgarsvæðinu þurfti að hafa afskipti af ungmennum á Granda vegna hraðaksturs. Kvartað var undan hávaða.

Lögreglan greip í tómt þó þegar hún kom á vettvang en segir það þekkt að ungmenni séu að aka hratt á þessum slóðum og valda ónæði. Mikil hætta skapast af þessu hátterni samkvæmt lögreglunni.

Nokkuð var um pústra í miðborg Reykjavíkur en engar alvarlegar líkamsárásir komu upp. Ráðist var tvisvar á dyraverði við skemmtistaði en báðar árásirnar voru minniháttar.

Lögreglan hafði einnig afskipti af unglingahópi í Austurstræti sem voru við drykkju. Hópurinn tvístraðist þegar lögreglan kom á vettavang. Tveir 16 ára piltar sem neyttu áfengis voru færðir niður á lögreglustöð þar sem foreldrar þeirra sóttu þá.