Stórþjófnaður: Fimm hundruð geislasteinum stolið

Verðmætu steinasafni var stolið af bænum Teigarhorni við Djúpavog fyrir helgi en þjófnaðurinn uppgvötaðist ekki fyrr en í gær. Eigandi steinanna, Jónína Ingvarsdóttir, telur að þjófurinn hafi ásælst steinanna sérstaklega. Jónína segir að steinarnir, sem eru svokallaðir geislasteinar, eða Zeolíte-steinar, séu milljóna króna virði.

„Þeir eru minnsta kosti fimmtán milljón króna virði," segir Jónína sem hefur safnað steinunum í sautján ár. Þjófurinn, eða þjófarnir, rifu upp plötu sem var negld fyrir gluggann á bænum en sjálf var Jónína í höfuðborginni ásamt manni sínum sem er með heilakrabbamein. Þegar hún snéri aftur á Teigarhorn sá hún að þjófurinn var búinn að stela hátt í fimmhundruð geislasteinum.

„Og það var búið að pakka þeim inn og allt," segir Jónína forviða sem grunar að þjófarnir hafi ekki ásælt neitt annað en steinana enda var ekkert annað tekið á bænum fyrir utan pappír til þess að pakka þeim inn.

Spurð hvort það sé hægt að koma slíkum steinum í verð segir Jónína að það sé helst erlendis sem menn geti það.

Hún segir að minnstu steinarnir sem voru teknir hafi verið nokkur grömm, þyngsti steininn vó fjörtíu kíló. Steinarnir voru ótryggðir.

Teigarhorn er heimsfrægt fyrir framúrsakarandi safn geislasteina. Svæðið í kringum Teigarhorn var friðlýst árið 1975 vegna geislasteinanna og er einn þekktasti fundarstaður slíkra steina í heiminum.

Geislasteinar eða zeólítar eru mjög algengir sem holufyllingar í bergi hér á landi og er Ísland þekkt á alþjóðavísu fyrir geislasteina. Geislasteinar eru jafnan hvítir eða glærir að lit en stundum litaðir af aðkomuefnum.

Hafi einhver upplýsingar um þjófnaðinn eða staðsetningu steinanna getur sá hinn sami haft samband við lögregluna á Fáskrúðsfirði í síma: 470 6140