Glóðarbruni í Grafarvogi

Glóðarbruni varð í Grafarvogi í nótt þegar leslampi féll á dýnu. Húsráðandinn kom heim til sín rúmlega tvö í nótt og fann þá sérkennilega eiturgufulykt. Hann fann engan eld en hringdi engu að síður í neyðarlínuna sem sendi slökkviliðið á svæðið.

Eftir nokkra leit fundu slökkviliðsmenn leslampa sem hafði fallið á dýnuna. Úr varð svokallaður glóðarbruni sem er hægfara bruni.

Þegar slökkviliðsmenn tóku dýnuna upp kviknaði í henni og mikinn reyk lagði af henni. Vel tókst að slökkva eldinn en reykræsta þurfti íbúðina í kjölfarið. Aðgerð slökkviliðsins gekk vel og rétt viðbrögð húsráðanda urðu til þess að ekki fór verr.