Vonar að upplausnin í samfélaginu sé á enda

„Það er von mín að sú upplausn sem verið hefur í samfélaginu sé nú að baki og við séum nú á sáttarleið," sagði Jóhanna Sigurðardóttir forsætisráðherra í stefnuræðu sinni á Alþingi nú undir kvöld. Jóhanna sagði að mikil umrót hefði verið í samfélaginu að undanförnu vegna efnahagshrunsins. Það hefði leitt til þess að ný stjórn hefði tekið við völdum. Ákall fólks um breytingar hafi haft áhrif.

Jóhanna sagði að mikilvægt væri að allir Íslendingar þyrftu að hjálpast að til að fá gangverk efnahagslífsins til að virka að nýju. Atvinnuleysistölur væru allt of háar og því miður gætu þær átt eftir að hækka. Sorglegt væri að glæfraháttur fárra hafi orðið til þess að 13 þúsund manns væru atvinnulausir. Mikilvægt væri að efla úrræði til þess að skapa atvinnu fyrir fólk á næstu misserum.

Jóhanna sagði að allur þingheimur þyrfti að starfa saman að því að koma brýnum úrræðuim áleiðis. Þjóðin þyrfti að sjá þingheim sameinaðan. Þá þyrfti þjóðin og allar helstu stofnanir þjóðarinnar að starfa saman.