Telur kosningar líklegar fyrir lok kjörtímabils

Þorgerður Katrín Gunnarsdóttir menntamálaráðherra telur líklegt að kosið verði áður en kjörtímabilinu lýkur árið 2011. Þetta sagði hún í þættinum Sprengisandi á Bylgjunni í morgun.

Krafan um kosningar er skiljanleg að mati Þorgerðar, en hún sagði þó ekki ráðlegt að kjósa strax. Það ætti í það minnsta ekki að gera fyrr en rannsóknarnefndin hefði skilað af sér í nóvember næstkomandi. Forðast þyrfti stjórnarkreppu í núverandi ástandi.

Þorgerður sagði sjálfstæðisflokkinn bera mikla ábyrgð á því ástandi sem nú ríkir. Ýmis mistök hafi verið gerð, ekki síst þau að tryggja ekki dreifða eignaraðild að bönkunum þegar þeir voru einkavæddir. Margt hefði þó líka verið gert rétt, til að mynda að ná ríkissjóði hallalausum.