Starf Benitez ekki í hættu í dag

Það hafa verið misvísandi fréttir um það síðustu daga hvort starf Benitez sé undir á leik Liverpool og Man. Utd í dag.

Tapi Liverpool verður það fimmta tap liðsins í röð. Slíkt hefur ekki gerst í 56 ár. Þess utan yrði Liverpool heilum tíu stigum á eftir United í deildinni.

Framkvæmdastjóri Liverpool, Christian Purslow, segir að starf Benitez sé ekki undir í dag.

„Liverpool er með langtímamarkmið og úrslit nokkurra leikja hafa ekki áhrif á þau markmið. Rafa Benitez er lykilmaður í þessum langtímamarkmiðum," sagði Purslow og bætti við að Benitez yrði við stjórnvölinn hjá liðinu í lok leiktíðar.

Þetta hljóta að vera góð tíðindi fyrir Benitez en það hefur einnig verið skrifað um að Liverpool hafi hreinlega ekki efni á að reka hann þar sem hann sé nýbúinn að skrifa undir nýjan samning við félagið.