Mælir með því að foreldrar sæki börnin í skólann

Veðurhæðin er við það að ná hámarki og það verður býsna hvasst á sunnan- og vestanverðu landinu fram til þrjú eða fjögur, segir Sigurður Þ. Ragnarsson veðurfræðingur á fréttastofu Stöðvar 2 og Vísis. Hann mælir með því að foreldrar sæki börn sín í skólann í dag, einkum ef um er að ræða ung börn.

Sigurður segir að veðurhamurinn sé í hámarki á Suðurlandi þessa stundina og það verði stöðugt óveður á Suðurlandi frameftir degi. Hámarki verði síðan náð í Reykjavík um hádegið og það gæti bætt í fyrir þann tíma. Mjög hvasst verði í Reykjavík fram til þrjú eða fjögur en þá ætti vindurinn að geta byrjað að ganga niður. Hins vegar fari ekki að hvessa að ráði á Snæfellsnesi og á Vestfjörðum fyrr en síðdegis og því megi búast við óveðri þar í kvöld.

„Góðu tíðindin eru þau að þó að það verði ekki logn á morgun þá er þetta allt á réttri leið," segir Sigurður. Hann býst við að það verði hvasst í fyrramálið en enginn stormur.

Sigurður tekur fram að almennt séð sé lítið ferðaveður á sunnan- og vestanverðu landinu.