Býst við að menn vilji lækka laun hjá Lífeyrissjóðunum

Verði laun æðstu stjórnenda ríkisstofnana og ríkisfyrirtækja lækkuð má búast við því að upp komi krafa um að laun stjórnenda Lífeyrissjóðanna verði endurskoðuð líka, að mati Árna Stefáns Jónssonar, formanns Starfsmannafélags ríkisins.

Í stjórnarsáttmála VG og Samfylkingarinnar er stefnt að því að engin ríkislaun verði hærri en laun forsætisráðherra. Árna Stefáni líst ágætlega á þetta. „Við höfum verið þeirrar skoðunar hjá BSRB að það mætti jafna meira launin heldur en hefur verið hingað til," segir Árni Stefán í samtali við fréttastofu. „Maður hefur haft þá skoðun að laun, aðallega hjá þessum ohf fyrirtækjum, hafi farið upp úr öllu valdi og engan veginn verið réttlætanleg," bætir Árni Stefán við.

Aðspurður hvaða aðilar hann telji að muni lækka í launum segist Árni Stefán ekki vera viss, en hann hafi heyrt um stjórnendur hjá Íbúðalánasjóði og Ríkisútvarpinu í umræðunni.