Peter Andre fær nýjan raunveruleikaþátt

Peter Andre virðist vera fóta sig vel eftir skilnaðinn við Katie Price, betur þekkta sem Jordan. Nú hefur hann fengið sinn eigin raunveruleikaþátt á ITV2 sjónvarpsstöðinni.

Í kvöld var frumsýnd heimildamynd um sambandslitin þar sem Pete er fylgt eftir. Myndin ber heitið Going It Alone, eða Fer þetta einn, eins og titillinn myndi hljóma þýddur á okkar ástkæra og ylhýra. Í þeirri mynd sést Pete brotna niður og háskæla, alls tíu sinnum.

Nú lítur út fyrir að breskir sjónvarpsáhorfendur komi til með að sjá Peter oftar á skjánum. Forsvarsmenn ITV2 sjónvarpsstöðvarinnar, voru svo hrifnir af heimildamyndinni að þeir buðu honum að vera með sinn eigin þátt sem mun bera heitið: The Next Chapter og hefst í október. Þátturinn mun svo vera sýndur í sex vikur til að byrja með.

Það er ljóst að Peter er að ná sér ágætlega niður á Jordan en nýlega sá hún til þess að honum yrði meinaður aðgangur í partý á vegum ITV sjónvarpsstöðvarinnar.