Gjöldin höfðu ekki fylgt verðlagsþróun

Þessi gjöld höfðu ekki fylgt verðlagsþróun og þess vegna var horft til þeirra, segir Helgi Hjörvar, formaður efnahags- og skattanefndar Alþingis. Alþingi samþykkti frumvarp um helgina sem kveður á um hækkun olíu- og bensíngjalds, hækkun bifreiðagjalda og hækkun áfengisgjalds. Gagnrýnt hefur verið að hækkun slíkra gjalda muni hækka verðbólgu og þar með hækka vísitölutengd lán, svo sem íbúðarlán.



Breytingar á tekjuskatti venjulega gerðar um áramót

Helgi segir að verið sé að fara yfir öll ríkisfjármálin, rekstur, millifærslur, gjöld og skatta til þess að komast út úr þeim 170 milljarða halla sem er á ríkissjóði á yfirstandandi ári. Hann bendir á að upphæðin nemi hátt í tveimur milljónum á hverja fjölskyldu í landinu. Núna þurfi strax að taka á 20 milljarða viðbótarhalla sem samsvari um 200 þúsund krónum á hvert heimili í landinu. „Hækkunin á þessum gjöldum er hluti af því að loka þessu gati. Það skilar okkur 2,7 milljörðum upp í það en síðan þarf að ráðast í enn frekari aðgerðir," segir Helgi. Hann segir að óhjákvæmilegt verði að fara inn á öll svið ríkisrekstursins. Breytingar á tekjuskatti séu hins vegar alla jafna gerðar um áramót og því nærtækara að fara í þetta sem fyrsta skref.



Verið að leiðrétta misræmi milli dísel og bensíns

Helgi segir að með því að gera breytingar á bensín- og olíugjöldum sé hægt að leiðrétta ákveðið misræmi sem hafi verið komið upp milli bensíns og dísels. „Því að þegar að menn lögðu af stað með olíugjaldið 2005 þá var því lofað að dísellinn yrði hagstæðari og það hefur, eins og menn vita, ekki gengið eftir. Og það er verið að leiðrétta," segir Helgi. Hann viðurkennir að hliðaráhrifin af hækkun gjaldanna séu óæskileg. „Við erum með þetta verðtryggingarkerfi af því að við erum með ónýtan gjaldmiðil og þess vegna hækkar vísitalan um hálft prósent. En þessi áhrif eru ekki einhlít, vegna þess að ef ekki er gripið til ráðstafana af þessu tagi þá veikir það auðvitað bæði stöðu ríkisins og efnahagslífið almennt," segir Helgi. Það myndi, með óbeinum hætti, hafa áhrif á verðlagsþróun, á gengi krónunnar, á vexti og svo framvegis.

Helgi leggur áherslu á að það sé ill nauðsyn að hækka gjöld til þess að auka ekki þann vanda sem Íslendingar standa frammi fyrir. „Þess vegna legg ég komin í sumar heildaráætlun um það hvernig við vinnum okkur út úr þessum verkefnum í ríkisfjármálum," segir Helgi.