Skattahækkun talin nauðsyn

Ólíklegt er talið að eigendur fasteigna muni njóta fyrirsjáanlegrar lækkunar á fasteignamati nú um mánaðamótin. Sveitarstjórnarfólk kvíðir mikilli lækkun og líklegt er talið að þau sveitarfélög sem ekki hafa fullnýtta álagsprósentu hækki hana til að halda óbreyttum tekjum.

Sveitarfélögin hafa notað álagsprósentuna sem sveiflujöfnunartæki til að álögur séu ekki óeðlilega miklar, sérstaklega þar sem þensla á fasteignamarkaði hefur verið mest. Þau hafa það í hendi sér að halda tekjum sínum óbreyttum, sem hins vegar þýðir að fasteignaeigendur njóta ekki þeirrar lækkunar sem talin er líkleg.