Kalla saman almannavarnarnefnd vegna skjálftanna

„Fólk heldur rónni," segir Jóna Kristín Þorvaldsdóttir, bæjarstjóri í Grindavík. Jarðskjálfti upp á 4,5 á Richter með uppök undir Fagradalsfjalli varð um klukkan hálftvö í dag.

Jóna segist ekki hafa verið sjálf stödd í Grindavík þegar skjálftinn varð en hún hafi heyrt í fólki þar og skjálftinn hafi fundist greinilega. Jóna og Ásmundur Jónsson slökkviliðsstjóri í Grindavík hafa ákveðið að kalla saman almannavarnarnefnd um fimmleytið í dag, en í henni eiga sæti meðal annars slökkviliðsstjóri, bæjarstjóri, fulltrúi frá lögreglu, fulltrúi frá björgunarsveit og fulltrúi frá Rauða krossi.

Á fundinum verður farið yfir stöðu mála og horfur framundan. Hvorki Jóna né Ásmundur kannast við að skemmdir hafi orðið vegna skjálftans í dag.