Gott bland í Eurovision-pokanum

Fimmtán lög reyna með sér í janúar í íslenska Eurovision-forvalinu. Haldin verða þrjú undanúrslitakvöld og áhorfendur kjósa tvö lög áfram í hvert skipti. Sex lög keppa því til úrslita 6. febrúar og eitt fer til Noregs í maí.

Lagahöfundar og flytjendur eru blandaður hópur lengra kominna og byrjenda í bransanum. Sumir eru að taka þátt í Eurovision í fyrsta skipti, aðrir hafa komið við sögu áður.

Fyrsta undankeppnin fer fram 9. janúar. Þar verður boðið upp á þrjár söngkonur og tvö söngvara. Hin sextán ára Karen Pálsdóttir stígur á stokk með lag Bryndísar Sunnu Valdimarsdóttir og Daða Georgssonar, In the Future. Írís Hólm, sem var í X-factor í söngflokknum Gís og hefur sungið með Bermuda, syngur lag hljómborðsleikarans Birgis Jóhanns Birgissonar og bolvíska söngkonan Kolbrún Eva Viktorsdóttir syngur lag eftir eiginmann sinn, Harald Gunnar Ásmundsson, You Are the One. Matthías „Papi“ Matthíasson er á heimavelli og syngur lag Akureyringsins Matthíasar Stefánssonar, Out of Sight, og Sigurjón Brink syngur You Knocked Upon My Door eftir Jóhannes Kára Kristinsson. Allt á ensku, sem sagt, fyrsta kvöldið.

Hinn 16. janúar verður boðið upp á tvær hljómsveitir, tvo söngvara og eina söngkonu, Sigrúnu Völu Baldursdóttur, sem syngur I Believe in Angels eftir Halldór Guðjónsson. Edgar Smári Atlason syngur Now and Forever eftir Albert G. Jónsson og Jógvan Hansen syngur lag Óskars Páls og Bubba. Það er á ensku og heitir One More Day. Hljómsveitirnar tvær syngja báðar á íslensku. Menn ársins flytur Gefst ekki upp eftir Harald V. Sveinbjörnsson og Hvanndalsbræður taka Gleði og glens eftir Rögnvald „gáfaða“ Rögnvaldsson.

Áfram heldur Eurovision-stuðið síðasta undankvöldið 23. janúar.

Þá verður boðið upp á tvær söngkonur og þrjá söngvara. Arnar Jónsson, áður í Lúxor, syngur annað lag Jóhannesar Kára Kristinssonar í keppninni í ár, Þúsund stjörnur. Sigurjón Brink syngur eigið lag, Waterslide. Sjonni Brink er sem sé tvöfaldur í Eurovision í ár. Þá ætlar Steinarr Logi Nesheim úr Kung Fú og Dead Sea Apple að syngja eigið lag, Every Word. Anna Hlín syngur Komdu á morgun til mín eftir Grétar Sigurbergsson og Hera Björk virðist ætla að syngja á frönsku, allavega viðlagið, því lag hennar og Örlygs Smára heitir Je Ne Sais Quoi.

drgunni@frettabladid.is