Um 60% Íslendinga ætla eingöngu að ferðast innanlands

Rúmlega 60% Íslendinga ætlar eingöngu að ferðast innanlands í sumar ef marka má niðurstöður könnunar sem MMR gerði fyrir Ferðamálastofu. Um fjórðungur ætlar að ferðast bæði innanlands og utan, þannig að hlutfall þeirra sem ætla að ferðast innanlands er um 90%. Þetta er nokkuð hærra hlutfall en fyrri kannanir Ferðamálastofu hafa sýnt. Um 5% ætlar eingöngu að ferðast utanlands. Átta prósent ætla hins vegar ekki að ferðast.

Flestir ætla að ferðast seinni hlutann í júlí en þá ætla þrír af hverjum fimm landsmanna að ferðast. Helmingur ætlar hins vegar að ferðast fyrri partinn í júlí eða ágúst, en fjölmargir þó á öðrum tímabilum.

Þrír af hverjum fimm sem ferðast innanlands ætla að gista í tjaldi, fellihýsi eða húsbíl, tveir af hverjum fimm hjá vinum og ættingjum og þriðjungur í sumarhúsi í einkaeigu eða orlofshúsi félagasamtaka. Suðurland og Norðurland verða fjölsóttustu landshlutarnir, samkvæmt könnuninni og sú afþreying sem landsmenn eru líklegastir að greiða fyrir er sund, jarðböð, veiði, söfn og sýningar.