Rio býst við brjáluðu Liverpool-liði

Rio Ferdinand, varnarmaður Man. Utd, býst við ekki við neinu öðru en sterku Liverpool-liði um helgina þó svo liðinu hafi gengið flest í mót í upphafi tímabilsins.

Byrjun Liverpool á deildinni er sú versta hjá félaginu í 22 ár.

„Það er pressa á báðum liðum enda vilja bæði vinna. Deildin verður óvenju jöfn að þessu sinni. Gengi liðanna skiptir engu þegar út í þennan leik er komið. Það eina sem skiptir máli er hvernig liðin spila þennan dag. Það er það eina sem skilur á milli," sagði Rio sem vill ekki afskrifa Liverpool úr baráttunni.

„Það er allt of snemmt að koma með slíka spádóma, skiptir engu hvernig þessi leikur fer. Bæði lið hafa alla burði til þess að standa sig vel í vetur."

Rio fór af velli eftir 57 mínútur í Meistaradeildarleiknum gegn CSKA Moskvu þar sem hann er tæpur vegna meiðsla í læri.

Sjálfur býst hann samt ekki við öðru en að vera í toppformi á sunnudag og klár í slaginn stóra.