Braut gegn 14 ára stúlku í bílnum sínum

Hæstiréttur hefur staðfest dóm Héraðsdóms Reykjavíkur yfir karlmanni á fertugsaldri fyrir kynferðisbrot gegn 14 ára stúlku. Hann var dæmdur í 15 mánaða fangelsi en þar af eru 12 mánuðir skilorðsbundnir til næstu þriggja ára. Ríkissaksóknari skaut málinu til Hæstaréttar og krafðist þess að refsing mannsins yrði þyngd. Hæstiréttur varð ekki við þeirri kröfu.

Maðurinn, sem er fæddur 1975, braut gegn stúlkunni á tímabilinu apríl til ágúst 2007 en stúlkan var þá 14 ára. Hann braut gegn henni með því að, í að minnsta kosti í tvö skipti á tímabilinu apríl til ágúst, sýna stúlkunni lim sinn og fróað sér í gegnum vefmyndavél í samskiptum þeirra á veraldarvefnum og þannig sært blygðunarsemi hennar með lostugu athæfi.

Í ágúst sama ár braut hann gegn stúlkunni í bifreið sinni í Heiðmörk þar sem hann sleikti kynfæri stúlkunnar, hafði við hana samræði og lét hana hafa við sig munnmök.

Héraðsdómur taldi manninum það til bóta að hann hafði játað brot sín skýlaust, ekki hlotið dóm áður og jafnframt leitað sér læknismeðferðar. Eins og áður sagði staðfesti Hæstiréttur í dag úrskurð héraðsdóms.

Dóminn kváðu upp þeir Markús Sigurbjörnsson, Jón Steinar Gunnlaugsson og Viðar Már Matthíasson.