Þingsetning í skugga pólitísks glundroða

Staða ríkisstjórnar Jóhönnu Sigurðardóttur er afar veik eftir atburði síðustu daga og óvíst hvort hún hefur pólitískt þrek til að starfa mikið lengur.

Afsögn Ögmundar Jónassonar og óljós staða Icesave-málsins ráða mestu en fleira kemur til. Togstreitu gætir í röðum Samfylkingarinnar í garð samstarfsflokksins. Til að mynda eru Samfylkingarþingmenn óánægðir með ákvörðun Svandísar Svavarsdóttur umhverfisráðherra um að una ekki úrskurði Skipulagsstofnunar um ónauðsyn sameiginlegs mats á umhverfisáhrifum Helguvíkurálvers. Jafnframt telja þeir Jón Bjarnason, sjávarútvegs- og landbúnaðarráðherra, ganga fullhart fram í andstöðu sinni við ESB-aðild. Enda þótt hann sé frjáls að skoðunum sínum hafi ríkisstjórn og Alþingi ákveðið að ganga til aðildarviðræðna við sambandið.

Hvað sem þessari óánægju líður telja þeir þingmenn Samfylkingarinnar sem Fréttablaðið ræddi við annað ríkisstjórnarsamstarf ófært.

Hinir sömu sögðu algjöra einurð ríkja í þingflokki sínum um að halda áfram samstarfinu við Alþjóðagjaldeyrissjóðinn og semja þannig um Icesave að Bretar og Hollendingar geti við unað. Að öðrum kosti sé endurreisn efnahagslífsins ómöguleg. Jóhanna Sigurðardóttir hefur því stuðning alls síns liðs.

Staðan innan VG er flóknari. Efasemda gagnvart Icesave gætir víðar en hjá Ögmundi Jónassyni.

Guðfríði Lilju Grétarsdóttur, Lilju Mósesdóttur og Ásmundi Einari Daðasyni er í nöp við málið en heldur er talið að Guðfríður Lilja og Ásmundur greiði götu þess þegar ríkisstjórninni, undir forystu Steingríms J. Sigfússonar fjármálaráðherra, hefur auðnast að ná samkomulagi við viðsemjendurna. Með öllu er óvíst um afstöðu Lilju Mósesdóttur.

Innan þingflokks VG er, líkt og hjá Samfylkingunni, full samstaða um að halda beri stjórnarsamstarfinu áfram.

Þingsetningarathöfnin hefst á guðsþjónustu í Dómkirkjunni klukkan hálf tvö í dag. Að henni lokinni verður eiginleg þingsetning í Alþingishúsinu með ávarpi forseta.

Fjárlagafrumvarpinu verður útbýtt klukkan fjögur.

Stefnuræða forsætisráðherra er áformuð á mánudag.

bjorn@frettabladid.is