Líðan mannsins eftir atvikum góð

Líðan mannsins sem bjargað var úr brennandi húsi á Akureyri í kvöld er eftir atvikum góð en hann var lagður inn á lyfjadeild Fjórðungssjúkrahússins til eftirlits í nótt. Fram kemur á vef slökkviliðs Akureyrar að talið sé að eldurinn hafi kviknað út frá rafmagni en húsið er mikið mikið skemmt og þak þess ónýtt.

Eldur kom upp í gömlu timburhúsi við Barmahlíð í Glerárhverfi á Akureyri í níunda tímanum í kvöld. Þegar slökkviliðið kom á staðinn logaði eldur upp úr þaki hússins.

Á vef slökkviliðsins segir að reykkafarar hafi farið strax inn í húsið og fundu mann á sextugsaldri í svefnherbergi og björguðu honum út. Hann var með einhverja meðvitund en var fluttur með sjúkrabíl á slysadeild með reykeitrun.

Eftir að reykkafarar höfðu leitað af sér allan grun um að fleiri væru í húsinu var farið í að ráða niðurlögum eldsins sem var mestur í þaki hússins. Þurfti að rífa þakið talsvert til að komast fyrir allan eld.

Auk fimm manna vaktar slökkviliðsins á Akureyri voru kallaðar út tvær vaktir til viðbótar auk yfirmanna. Ennfremur voru tveir menn staddir á slökkvistöð sem voru á frívakt. Því var strax hægt að senda tvær slökkvibifreiðar auk sjúkrabíls á staðinn og hefja slökkvistörf strax auk þess að flytja manninn sem bjargað var á sjúkrahús. Samtals tóku 21 slökkviliðsmenn þátt í slökkvistarfinu í kvöld.