Tilbúinn að gefa góð ráð ef formleg ósk berst

Æðsti yfirmaður sjávarútvegsmála Evrópusambandsins, Möltubúinn Joe Borg, birtir grein í Fréttablaðinu í dag þar sem hann ekki aðeins óskar eftir aðstoð Íslendinga heldur boðar einnig að sjávarútvegsstefnan verði endurskoðuð þannig að ákvarðanir verði færðar nær þeim sem þær snerta.

Spurður hvort Joe Borg sé með þessu að reyna að lokka Íslendinga inn í sambandið svarar Jón Bjarnason að sér heyrist hann frekar vera að lýsa vandræðum Evrópusambandsins. Vandi þess í sjávarútvegi sé pólitísks eðlis, liggi í uppbyggingu sambandsins sjálfs og samþjöppun valds í Brussel, og sýni best hversu lítið erindi Íslendingar eigi þarna inn.

Jón kveðst ekki hafa trú á því að Íslendingar leysi þennan pólitíska vanda. Joe Borg verði fyrst og fremst að snúa sér innávið með sinn vanda. Það sé þó sjálfsagt að veita honum ráð, ef óskað sé formlega eftir því.

Jón telur það mikla bjartsýni að halda að Íslendingum bjóðist þarna tækifæri til að móta sjávarútvegsstefnuna. Það sé mikil bjartsýni að halda að Íslendingar breyti grunnstoðum Evrópusambandsins.