Óljóst með fasteignalánin hjá Kaupþingi

Fólk með erlend fasteignalán hjá Landsbankanum getur fengið lækkun á höfuðstól við skuldbreytingu í óverðtryggð krónulán, líkt og hjá Íslandsbanka. Enn er óljóst hvort Kaupþing býður viðskiptavinum sínum upp á að leiðréttingu fasteignalána.

Íslandsbanki upplýsti í síðustu viku að hann hyggðist - fyrstur íslenskra lánastofnana - bjóða viðskiptavinum upp á leiðréttingar á höfuðstólum fasteignalána. Viðskiptavinir bankans geta frá næstu mánaðamótum óskað eftir því að breyta fasteignalánum í óverðtryggð krónulán og við þá breytingu verða höfuðstólar gengislána færðir niður um 25% og 10% á verðtryggðum lánum.

Skömmu síðar kynnti ríkisstjórnin sínar aðgerðir sem felast í lækkun greiðslubyrði lána, þ.e. fólk getur óskað eftir því, hjá hvaða banka sem er, að lækka mánaðarlegar afborganir. Á verðtryggðum lánum verður greiðslan miðuð við 1. janúar í fyrra en gengistryggð í maí í fyrra. Með þessari leið hækka eftirstöðvarnar hraðar - hins vegar er sett þriggja ára þak á lengingu lánstímans.

Kaupþing og Landsbanki höfðu ekkert ákveðið í síðustu viku hvort þeirra viðskiptavinir gætu fengið leiðréttingar á höfuðstólum. Fréttastofa ítrekaði í dag fyrirspurnir sínar. Hjá Kaupþingi fengust þær upplýsingar að þar sæti hópur manna við að reikna hvort og þá hvaða aðgerðir bankinn getur gripið til í þessum efnum. Landsbankinn hefur hins vegar ákveðið að bjóða fólki með myntkörfulán að skuldbreyta þeim í óverðtryggð krónulán og verður þá einhver leiðrétting á höfuðstól. Óvíst er hversu mikil leiðréttingin verður. Landsbankinn ætlar hins vegar ekki að leiðrétta höfuðstóla verðtryggðra krónulána.