Ólafur F.: Með jafnhreinan skjöld nú sem fyrr

„Árið 2008 var ekki unað við það af okkar hálfu að flokkur úti í bæ sem var ekkert að vinna með okkur ætlaði að fá aftur þetta fé annað árið í röð til þess eins í besta falli að klekkja á okkur, en ekki til að láta fjármuni renna til framboðsins," segir Ólafur F. Magnússon, óháður borgarfulltrúi.

Ólafur segir borgarstjórnarflokk Frjálslynda flokksins, sem nú er orðinn óháður, ekki hafa fengið krónu af því fé sem hann segir ætlað til starfsemi flokksins, heldur hafi því verið varið í að greiða niður skuldir og halda úti skrifstofu Frjálslyndra, sem Ólafur kallar vinakerfi. Því hafi hann brugðið á það ráð að halda sjálfur utan um féð.

Í lögum um stjórnmálaflokka segir að sveitarfélögum yfir ákveðinni stærð sé skylt að veita stjórnmálasamtökum sem ná ákveðnu lágmarksfylgi fjárframlög til starfsemi sinnar. Nú hafa risið upp deilur milli Ólafs og Guðjóns Arnars Kristjánssonar, formanns Frjálslyndra, um hvort féð skuli renna til borgarstjórnarflokksins, sem Ólafur skipar einn, eða til Frjálslyndra.

„Þeir hafa sýnt sig um að vera ófærir um að stjórna eigin fjármálum. Ég held að ég hafi þvert á móti sýnt að ég sé ráðdeildarmaður í fjármálum, enda sá borgarfulltrúi sem hefur farið best með almannafé í gegnum tíðina," segir Ólafur, og harmar árásina sem hann telur forystu Frjálslyndra gera á mannorð sitt.

Ólafur segir borgarmálafélag F-listans, sem stofnað var utan um starfsemi borgarstjórnarflokksins, hafa fyrir því lögfræðiálit að fjárframlagið eigi að renna til framboðsins Frjálslyndra og óháðra, en ekki til flokksins á landsvísu.

Ólafur segir sáralítið fé hafa runnið úr sjóðnum undanfarið ár, en það hafi einkum verið vegna lögfræðikostnaðar og fundahalda. Hann muni að sjálfsögðu gera grein fyrir því.

„Ég hef jafnhreinan skjöld í þessu og öllu sem ég hef starfað á opinberum vettvangi og mannorð mitt og heiðarleiki verður ekki dregið í efa nú frekar en fyrr," segir Ólafur, sem óttast ekki kæru Frjálslyndra á hendur honum vegna hins meinta fjárdrátts, heldur segist hlæja að henni.