Reykjavíkurborg hækkar fjárhagsaðstoð við nauðstadda

Samkvæmt nýsamþykktri fjárhagsáætlun Reykjavíkurborgar fyrir árið 2009 er gert ráð fyrir að grunnfjárhæð fjárhagsaðstoðar við þá íbúa borgarinnar sem eiga rétt á aðstoð verði hækkuð um 16,35% og fjármagn til fjárhagsaðstoðar verði aukið. Þetta kemur fram í tilkynningu frá borginni.

Þar kemur fram að grunnfjárhæð fjárhagsaðstoðar verði hækkuð um 16,35%. Það þýði að framfærsla einstaklinga hækki úr 99.329 krónum á mánuði í 115.567. Sé miðað við hjón eða fólk í skráðri sambúð hækki framfærslan úr 158.926 krónum í 184.907. Fjármagn til fjárhagsaðstoðar verði einnig aukið og nemi aukningin 2,1 milljarði króna í fjárhagsáætlun borgarinnar fyrir árið 2009.

„Forsendur fjárhagsáætlunar gera ráð fyrir 7% atvinnuleysi en vegna mikillar óvissu um hvernig atvinnuleysi mun þróast hefur verið ákveðið að fjárhagsaðstoð verði bundinn liður í fjárhagsáætlun borgarinnar. Það þýðir að aukist þörf fyrir fjárhagsaðstoð mun borgarsjóður koma til móts við aukin útgjöld. Heimildargreiðslur vegna barna verða einnig hækkaðar um 16,35% og verða einnig bundinn liður," segir í tilkynningu frá borginni.

Þar kemur fram að fjárhagsaðstoðin sé ætluð sem tímabundin neyðaraðstoð við þá sem hafi tekjur undir viðmiðunarmörkum. Að öllu jöfnu hafi umsækjendur kannað til þrautar rétt á öðrum greiðslum, ss. atvinnuleysisbótum, sjúkrabótum eða lífeyrisgreiðslum, áður en þeir sæki um fjárhagsaðstoð til sveitarfélagsins. Öll fjárhagsaðstoð til framfærslu sé skattskyld og af henni reiknuð staðgreiðsla skatta.