Rýr tillaga um aðildarviðræður

Birgitta Jónsdóttir, þingflokksformaður Borgarahreyfingarinnar, segir að þingsályktunartillaga utanríkisráðherra um aðildarviðræður við Evrópusambandið sé öllu rýrari en hún hafi átt von á. Hún vill að leynd um tillöguna verði aflétt sem fyrst. Þá telur hún líklegt að erfiðlega muni reynast að ná samstöðu um tillöguna vegna afstöðu Framsóknarflokks og Sjálfstæðisflokks.

Formenn stjórnarflokkanna kynntu drög að þingsályktunartillögunni fyrir forystumönnum stjórnarandstöðuflokkanna í gær. Össur Skarphéðinsson, utanríkisráðherra, mun funda þeim í dag og reyna að ná samstöðu um tillöguna. Birgitta segir óþarfi að gera tillöguna tortryggilega og því skorar hún á stjórnarflokkanna að aflétta allri leynd um málið. Hún geri sér þó grein fyrir því að fara verði fyrir orðalag fyrir lokaútgáfu tillögunnar.

Í ljósi afstöðu formanna Sjálfstæðisflokks og Framsóknarflokks telur Birgitta allt eins líklegt að erfitt gæti reynst að ná tillögunni í gegnum þingið. Sjálf segir Birgitta hins vegar jákvætt að þingið fái að fjalla um málið þvert á flokkslínur.

„Það er mjög mikilvægt að fólk reyni að vinna saman út frá málefnum og reyni að finna lausnir í stað þess að finna bara gallana. Auðvitað á stjórnarandstaðan að vera staðföst og veita aðhald en hún á líka að vera sanngjörn og samvinnufús," segir þingflokksformaðurinn.

Birgitta telur að komið verði til móts við þær kröfur sem Borgarahreyfingin setti sem skilyrði fyrir stuðningi sínum við tillöguna. „Mér heyrst ekkert vera því til fyrirstöðu en þetta hlýtur að skýrast eftir fundinn í dag."