Sigmundur vildi frekar ræða herbergjaskipan en ESB

Sigmundur Davíð Gunnlaugsson, formaður Framsóknarflokksins, vildi heldur ræða herbergjaskipan þingflokka í húsakynnum Alþingis en þingsályktunartillögu um aðildarviðræður á fundi formanna stjórnarflokkanna og forystumanna stjórnarandstöðuflokkanna í gær. Þetta segir Birgitta Jónsdóttir, þingflokksformaður Borgarahreyfingarinnar. Hún segir að þetta hafi komið sér verulaga á óvart.

„Það kom mér á óvart að Sigmundur skyldi biðja ríkisstjórnina að taka einhverja afstöðu í málinu því þetta er auðvitað mál starfsmanna þingsins," segir Birgitta. „Þetta er greinilega mikið tilfinningadæmi hjá þeim en auðvitað á það ekki vera þannig."

Framsóknarmenn vilja ekki flytja úr þingflokksherbergi sem flokkurinn hefur haft til umráða í Alþingishúsinu undanfarna áratugi. Á grundvelli kosningaúrslitanna ákvað skrifstofa Alþingis að Vinstri grænir og Framsóknarflokkurinn hefðu herbergjaskipti. Núverandi þingflokksherbergi VG rúmar einungis níu þingmenn en flokkurinn fékk 14 þingmenn kjörna í kosningunum. Þingmenn Framsóknarflokksins eru níu.

Birgitta segir að tvær blokkir á Alþingi hafi í gegnum tíðina alltaf fengið sínu framgengt en framsóknarmenn verði að átta sig á því að nú séu breyttir tímar. Nýta eigi herbergi út frá stærð þingflokka en ekki út frá ímynduðu eignarhaldi stjórnmálaflokka.