Alþingi sett á morgun

Þingmenn koma saman á morgun þegar 137. löggjafarþing Alþingis verður sett. Þingsetningin hefst með guðsþjónustu klukkan hálftvö í Dómkirkjunni. Kjörin verður nýr forseti og formenn fastanefnda.

Að guðsþjónustu lokinni ganga Ólafur Ragnar Grímsson, forseti Íslands, Karl Sigurbjörnsson, biskupinn yfir Íslandi, Guðbjartur Hannesson forseti Alþingis, ráðherrar, alþingismenn og aðrir gestir til þinghússins.

Ólafur Ragnar setur Alþingi og að því loknu tekur starfsaldursforseti, Jóhanna Sigurðardóttir forsætisráðherra, við fundarstjórn, og stjórnar kjöri kjörbréfanefndar. Þingsetningarfundi verður síðan frestað til klukkan fjögur síðdegis.

Þegar þingsetningarfundi verður fram haldið verða kjörbréf afgreidd og drengskaparheit unnin. Jóhanna mun síðan stjórna kjöri forseta Alþingis, kosnir verða varaforsetar og kosið verður í fastanefndir Alþingis.