Þurfti að slá lán fyrir tannviðgerð á dóttur sinni

Móðir fjögurra ára stúlku þurfti að greiða tæplega eitthundrað þúsund krónur fyrir tannviðgerð á dóttur sinni en fékk þriðjung endurgreiddan frá Tryggingastofnun. Hún þurfti að slá lán fyrir reikningnum og hefur enn ekki getað greitt það niður.

Inga Þóra Þóroddsdóttir móðir Karenar, fjögurra ára gekk á milli tannlækna í leit að hagstæðasta verði fyrir dóttur sína. Karen er með of hátt sýrustig í munni og þurfti að gangast undir viðamikla tannviðgerð. Auk þess þjáist hún af ofsahræðslu í tannlæknastólnum og þurfti því að svæfa hana.

Þegar hún hafði fundið ódýrustu tannlæknaþjónustuna þurfti hún að greiða um 95 þúsund krónur. Af því fékk hún 30 þúsund endurgreiddar.

Inga Þóra segir að enginn geti reitt fram slíkar upphæðir á einu bretti. Fólk veigri sér við því að fara til tannlæknis þar sem kostnaðurinn sé himinhár.

„Mér finnst það bara til skammar að fá ekki meira endurgreitt frá Tryggingastofnun," segir Inga Þóra.

Könnun frá 2005 sýnir að tannheilsa íslenskra barna sé verri en barna á norðurlöndunum. En það hefur versnað segir Sigurður Rúnar Sæmundsson barnatannlæknir.

Sigurður segir gjaldskrá Tryggingastofnunar lítið hafa hækkað frá árinu 1998. Auk þess hafi tannlæknar gefist upp á að verðleggja sig eftir gjaldskrá TR. Hann segir að Tryggingastofnun endurgreiði ekki 75% eins og forsvarsmenn hennar haldi fram. Það sé öllu nær 30-50%. Hann segir brýnt að grípa til aðgerða strax.