Ferguson: Owen á eftir að vera lengi hjá okkur

Dagurinn í dag verður örugglega einstaklega eftirminnilegur fyrir Michael Owen. Hann snýr aftur á sinn gamla heimavöll með liði erkifjendanna og á örugglega eftir að fá kaldar móttökur frá stuðningsmönnum Liverpool.

Það kom gríðarlega á óvart þegar Owen skrifaði undir tveggja ára samning við United í sumar. Sir Alex Ferguson, stjóri Man. Utd, býst við því að Owen verði lengur enda aðeins 29 ára gamall.

„Hann er rétt að byrja hjá okkur. Hann er aðeins búinn að vera hér í nokkra mánuði og ég vona að hann verði hér lengi. Ég held hann geti vel staðið sig hjá okkur.

Hann hefur þegar sýnt að hann er einstakur atvinnumaður sem lifir sínu lífi á réttan hátt. Það eru engin vandræði á honum," sagði Ferguson.