Arftaki Sigga Storms hleypur maraþon

Ásamt því að flytja fréttir af veðrinu hefur veðurfréttakonan Elísabet Margeirsdóttir hlaupið fimm maraþon á síðustu fjórum árum.

„Ég byrjaði að skokka og stunda líkamsrækt þegar ég var um sextán ára gömul og eftir það fór ég að æfa hlaup. Það fer langur tími í undirbúning fyrir hvert hlaup og undanfarið hef ég verið að æfa með þjálfara ásamt nokkrum öðrum hlaupurum. Ég hljóp síðast maraþon í Frankfurt í október og hljóp það á þremur og hálfum tíma,“ segir Elísabet sem hefur tvisvar hlaupið í New York og einu sinni í Kaupmannahöfn og Berlin. Aðspurð segir hún erfitt að hlaupa heilt maraþon og segir síðustu fimm til tíu kílómetrana vera andlega erfiða en það gerist sjaldan að fólk gefist upp og ljúki ekki hlaupinu.

Elísabet hefur sinnt starfi veðurfréttamanns í rúmt ár og til að byrja með stóð hún í skugganum af sjálfum Sigga Storm. Hann kvaddi hins vegar áhorfendur Stöðvar 2 nokkuð skyndilega og þegar Elísabet er innt eftir því hvort það hafi ekki verið erfitt að taka við af Sigga segir Elísabet svo ekki vera. „Það breyttist ekki mikið en mér fannst leiðinlegt að missa hann af skjánum, hann var skemmtilegur karakter sem sagði skemmtilega frá.“

Og spurð hvort Íslendingar geti átt von á hvítum jólum í ár segir Elísabet að erfitt sé að spá fyrir um það að svo stöddu. „Það fer kólnandi í vikunni og ætti að snjóa norðaustanlands um helgina. Það er smá úrkoma í kortunum suðvestanlands eftir helgi og ágætis líkur á að hún falli sem snjókoma. Spár geta snögglega breyst en ég vona að við fáum hvít jól,“ segir Elísabet að lokum. -sm