Cole hafnaði möguleika á að spila með Notts County

Framherjinn Andy Cole greinir frá því í dálki sínum í dagblaðinu The Independent að hann hafi fengið óformlegt tilboð um að taka takkaskóna af hillunni til þess að spila með Notts County.

Hann hafi hins vegar neitað boðinu og skilur ákvörðun góðvinar síns Sol Campbell að yfirgefa félagið mjög vel.

„Ég rakst á Sven [Göran Eriksson, yfirmanna knattspyrnumála Hjá Notts County] fyrir nokkrum vikum og hann spurði mig strax hvort að ég væri ekki tilbúinn að byrja að spila aftur og taka þátt í þessu verkefni með Notts County. Ég þurfti nú ekki að hugsa mig lengi um og svaraði strax nei takk, áður en ég vissi fyrir víst hversu mikil alvara var í þessu hjá honum.

Ég verð annars að segja að ég skil vel hvað Sol Campbell ætlaði sér með þessu ævintýri hjá Notts County.

Ég veit að hann hefur hug á því að snúa sér að knattspyrnustjórn eftir að leikmannaferlinum lýkur og því sá hann þetta sem kjörið verkefni fyrir sig. Hann vonaðist til þess að geta lært af reynslunni með félaginu í þessi fimm ár sem hann samdi um en síðan hafa ef til vill einhverjar aðstæður breyst og hann hefur því fengið samningi sínum rift.

Svona hlutir gerast í boltanum og þetta þarf því ekki að koma neitt sérstaklega á óvart," skrifar cole.

Hinn 37 ára gamli Cole tilkynnti formlega að hann væri hættur þann 11. nóvember árið 2008 eftir langan og farsælan feril en hann státar af því að vera annar markahæsti leikmaður í sögu ensku úrvalsdeildarinnar með 187 mörk.