Gazza skallar dyravörð - myndband

Paul Gascoigne heldur áfram að fara á kostum utan vallar en hann er enn reglulegur gestur á síðum slúðurblaða sökum vafasamrar hegðunar.

Vinir Gazza óttast að hann sé að drekka sig í hel og virðist ekkert lát vera á stífri drykkju kappans.

Hann kíkti á snókerstofu í Newcastle á dögunum og var ansi vel við skál. Hann kveikti ítrekað í sígarettum þó svo það væri bannað. Á endanum varð að vísa honum úr húsi þar sem hann vildi ekki hlýða.

Þá gerði Gazza sér lítið fyrir og skallaði dyravörðinn í andlitið.

"Ég lifði af Basra og svo kem ég heim og er skallaður af Paul Gascoigne. Þetta var hrikalega vont og ég var með hausverk í heilan dag," sagði dyravörðurinn sem er fyrrum hermaður. Hann ætlar ekki að kæra atvikið.

Öryggismyndavélar náðu skallanum á myndband og má sjá hann hér.