Færeyingar eru vinir í raun

Forsætisráðherra Íslands þakkaði í gær Færeyingum fyrir lán upp á þrjú hundruð milljónir danskra króna sem þeir veittu Íslendingum stuttu eftir íslenska bankahrunið.

„Þverpólitísk samstaða Færeyinga um þetta lán, sem veitt var skilyrðislaust þegar allir aðrir sneru við okkur baki í fyrra, sýnir hug þeirra betur en nokkur orð […] þeir eru vinir í raun,“ sagði forsætisráðherrann, Jóhanna Sigurðardóttir.

Orðin féllu á fundi hennar með Kaj Leo Johannesen, lögmanni Færeyinga, á Þingvöllum. Þar snæddu oddvitar þjóðanna hádegisverð, en Kaj Leo er hér í opinberri heimsókn.

Samkvæmt tilkynningu frá forsætisráðuneytinu var fjallað um heilbrigðismál, kreppur og fólksflótta, og einnig um fríverslunarsamning þjóðanna, Hoyvíkursáttmálann.

Kaj Leo þakkaði fyrir sig og sagði að í Færeyjum væri fylgst grannt með framgangi mála á Íslandi. „Sérstaklega nú þegar Ísland hefur sótt um aðild að Evrópusambandinu. Úrslit mála í aðildarferlinu gætu haft veruleg áhrif á pólitíska umræðu í Færeyjum,“ sagði hann.

Í kjölfar bankahrunsins veittu Færeyingar, ein þjóða, lán sitt án skilyrða um samstarf við yfirþjóðlegar stofnanir. - kóþ