Benitez: Leikmenn svöruðu mörgum spurningum í dag

Rafa Benitez, stjóri Liverpool, hældi sínum mönnum á hvert reipi eftir frábæran sigur á Englandsmeisturum Man. Utd. Þungu fargi var líka létt af Benitez enda hafði Liverpool tapað fjórum leikjum í röð fyrir leik dagsins.

„Leikmenn sýndu gríðarlegan karakter og stuðningsmennirnir fylktu sér á bak við liðið. Við vorum tólf á vellinum í dag," sagði Benitez.'

„Hugarfarið var gott og allir voru að vinna saman. Allt frá markverðinum til stuðningsmannanna. Leikmennirnir svöruðu mörgum spurningum í dag. Það var mikilvægast af öllu," sagði Benitez sem ætlar að halda sér á jörðinni þrátt fyrir sigurinn.

„Við verðum að halda áfram og megum ekki vera of ánægðir með okkur eftir þennan leik. Það er annar leikur á miðvikudag," sagði Rafa og bætti við.

„Þetta lið er betra en margir halda og það sýndi þann karakter og styrk sem það býr yfir í dag. Ég var ekki reiður yfir umfjölluninni sem var um mig fyrir leikinn og reyndi bara að halda mínu striki í vinnunni. Eina leiðin til að breyta umræðunni er að vinna leiki."