Evans og O'Shea frá þar til í janúar

Þeir Jonny Evans og John O'Shea, leikmenn Manchester United, verða báðir frá vegna meiðsla þar til í næsta mánuði.

Alex Ferguson, stjóri United, hefur átt í nokkrum vandræðum vegna meiðsla og veikinda varnarmanna sinna en samtals eru átta varnarmenn frá hjá félaginu um þessar mundir.

Patrice Evra er eini varnarmaðurinn í leikmannahópi United fyrir leik liðsins gegn Wolfsburg í Meistaradeild Evrópu á morgun.

Talið er líklegt að þeir Michael Carrick og Darren Fletcher spili í vörn United á morgun og jafnvel hinn nítján ára gamli Oliver Gill, sonur framkvæmdarstjórans David Gill.

Þar að auki eiga markvörðurinn Edwin van der Sar og miðvallarleikmaðurinn Owen Hargreaves einnig við meiðsli að stríða.